Schnitzelbänke
Schnitzelbänke 2010
Libyen-Affäre
Dä Ghadaffi isch en ganz en stolze Mah,
er haltet sich för de König vo Afrika.
Mit iserner Fuscht hebt är sini Geisle fescht,
Do nötzts au nüüt wenn de Merz git sis Bescht
Alli Bemühige sind bis jetzt im Sand verlauffe,
Drum empfehled mir Eu, s’Öl ab jetzt im Aldi z’chaufe
Refrain: Oh du liebe Ghadaffi, Ghadaffi, Ghadaffi
Oh du liebe Ghadaffi, los endli goh!
D’Geisle wönd hei goh und du stohsch ällei do
Oh du liebe Ghadaffi, los endli goh!
Zusatzspruch: Und wenn s’Öl im Aldi usgange isch,
denn chunnt halt säb vom Lidl of de Tisch!
U-17 Fussballnati
Wär hettis dänkt, mer sind Fuessball-Weltmeischter,
doch bi dem Team, das stört Herr und Frau Schweizer
heissets Seferovic, Hajrovic ond Nassim Ben Khalifa,
was aber fählt, isch en rechte Schwiizer Mah.
Doch halt! Eigentlich isch alls in Butter,
denn frisiert sinds alli besser, als ösen Alain Sutter!
Refrain: Oh du liebe A-ha-lain, A-ha-lain, A-ha-lain
Oh du liebe A-ha-lain, c’est ne pas bien!
Bi dinnere Mähne chonnt üs ganz schnell s’Gähne.
Oh du liebe A-ha-lain, c’est ne pas bien!
Zusatzspruch: Drum wötsch Erfolg ha, ufem Rase und bi de Fraue,
denn gang ganz schnäll zom Coiffeur, ond loh der d’Hoor abhaue!
Urnäscher Schnupfer
Au bim Schnupfe mommer ufpasse wammer seit,
da händ ösi Urnäscher Jodler zwenig öberleit.
Sie sind vom Fernseh debii gfilmet worde,
ond mönd fascht vor Gricht, da macht üs Sorge!
Bi so strengä Gsetz, do glaubed mir fascht,
d’UBS macht ihri nägscht GV gad im Knascht!
Refrain: Oh er liebi Manager, Manager, Manager
Oh er liebi Manager, gsehnds endli ih!
es goht nur um d’Chole diä händ er ös gstohle.
Oh er liebi Manager, gsehnds endli ih!
Zusatzspruch: Drum merke sich ein jeder, wiä das hüt so goht:
Schnupfe bringt di vor Gricht, bschiisse in en Verwaltigsrot.
Steuerverwaltung
Einä hät sini Stüüre miteme Betonchlotz wölle zahle,
ond dä Stüürbehörde hetti da au ganz guet gfalle.
Aber er hät d’Rechnig ohni d’Gier vo de Mensche gmacht
ond dä Chlotz isch weg gsi, praktisch öber Nacht.
Väterli Staat mue jetzt om sini Inahme bange,
aber simmer ehrlich, för d’Sanierig vo de IV würs eh nöd lange.
Refrain: Oh er liebi Stüürzahler, Stüürzahler, Stüürzahler
Oh er liebi Stüürzahler, merked ers nöd!
So zahl Dini Stüür au und alls goht i d’IV.
Oh er liebi Stüürzahler, merked ers nöd!
Zusatzspruch: Drom, wötsch e volls Portmonne ha,
schaffsch i de Landi en Bickel ah!
Grossbrandstelle Herisau
Dä Sommer hets in Herisau furchtbar brennt,
innere Hüserzile wo jedä vo üs kennt.
D’Führwehr isch usgrockt mit Muus und Mah,
hät aber bi denä Flamme en schwere Stand gha.
d’Bevölkerig spendet, ohni lang ume z’zanke
schliesslich händs scho vill meh zahlt för d’Rettig vo dä Banke!
Refrain: Oh er liebi Bänkerslüüt, Bänkerslüüt, Bänkerslüüt
Oh er liebi Bänkerslüüt, langets no nöd!
Mer sind am spare für eue neu Charre.
Oh er liebi Bänkerslüüt, langets no nöd!
Schweinegrippe (H1N1-Virus)
Öpe ein hät das Johr en Virus öberchoh
nämmli dä vo de Säulizüchter us Mexico.
Alli sind öber’s BAG am schimpfe
doch gange isch glich niemerd go impfe.
Mer kennäd öppis, da wirkt besser ond au schneller,
ond da isch i dä Huusbar dä Appezeller!
Refrain: Oh du liebi Säuligripp, Säuligripp, Säuligripp
Oh du liebi Säuligripp, bisch bald verbii!
Mer trinked en Chrüüter und fiired no lüüter.
Oh du liebi Säuligripp, bisch bald verbii!
Zusatzspruch: Ond hesch denn eimol zvill verwötscht,
bisch grad au scho g’impft för di Nögscht.
Minarette
Es hät ös glanget, mer händ endgültig gnueg
vorem Islam, förchts fäng am chlinschte Bueb.
Drom hämmers au verbotte, die cheibe Minarett
wär wött scho vomne Muezzin gweckt werdä, däheime i sim Bett
aber villicht müesst au üse Pfarrer mol vom Turm abe brülle,
denn wöred sich ösi Chirche wenigschtens zur Hälfti fülle!
Refrain: Oh Du liebs Pfarrerli, Pfarrerli, Pfarrerli
Oh Du liebs Pfarrerli, bisch ganz ällei
ischs da denn scho gsi mit de Eucharistie?
Oh Du liebs Pfarrerli, bisch ganz ällei!
Zusatzspruch: Doch au de Pfarrer isch, wämmer sichs richtig öberleit,
i de Chirche niä ällei dank de heilige Dreifaltigkeit!
Chinderhüete-Lizenz
Öse Bundesrot in Bern, dä tuet au das Johr wüete
er verlangt vo minnere Tante, e Lizenz zom Chinder hüete
nöd lang ischs gange, do hät s’Schwizer Volk richtig tobt
ond d’Regierig hät sGsetz wieder verworfe, do sägi nur: Gottlob!
Doch d’Wält häts registriert, ond das isch au nöd ohni,
denn d’Italiener sueched jetzt e Astandsdame fö de Berlusconi!
Refrain: Oh du liebä Silvio, Silvio, Silvio
Oh du liebä Silvio, halt di mol zrugg!
Vill Meitle hesch troffe doch d’Frau isch verloffe.
Oh du liebä Silvio, halt di mol zrugg!
Zusatzspruch: Ösi Michelle Hunziker, da wär doch no e flotti
aber denn muesch im Bett besser si, als de Eros Ramazotti
Alkoholisierte Jugend
Dä Samichlaus häts fang au schwer, mit ösere verdorbne Jugend
diä känned kei Respekt, geschweige denn s’Wort „Tugend“!
Fascht scho leid tuet är ös, de alti Mah mit de Mütze
hüt brucht er mehreri Schmutzli, zom sich vor Aagriff schütze.
Doch gern wöred mer en mol z’Herisau am Bahnhof gseh,
zom denä Teenager d’Bier- und Schnapsfläsche wägneh!
Refrain: Oh du liebä Samichlaus, Samichlaus, Samichlaus
Oh du liebä Samichlaus, ruum entlich uf!
d’Polizei hät kei Muet meh, mer bruched dini Ruete
Oh du liebä Samichlaus, ruum entlich uf!!
Zusatzspruch: Mir mached üs Sorge und tüend drom grad en Aatrag stellä,
und verlanged bim Bahnhofumbau au Platz für e Usnüechterigszellä!
Weibergeschichten
Mä gsehts bim Woods, bim Berlusconi und bim Hirschmah
wänd gnueg Chole häsch, chasch praktisch jedi Frau ha.
Muesch nur chli mitem Münz im Sack go klimpere,
scho gsehsch di jung Blond mit de Auge zwinkere
Mir sind zwor niidisch, aber s’nützt nüt üses Gestänker,
leider simmer kei riichi Investment-, sondern nume armi Schnitzel-Bänkler
Refrain: Oh Du liebi Damewält, Damewält, Damewält
Oh Du liebi Damewält, tüsch Di nöd z’fescht
Sie händ zwor vill Zaschter, doch genau so vill Laschter
Oh Du liebi Damewält, tüsch Di nöd z’fescht
Zusatzspruch: Und wötsch en Mah, wo loschtig isch und guet,
denn nimm eifach mich, und nöd dä mitem Huet!
Schnitzelbänke 2009
Üsi Fuessball-Nati hät d’Heim-EM wölle gwönne
Und mit üsne beschte Tschutter hettemer das au chöne.
Doch mitem Angsthasefuessball vo üsem Trainer Köbi,
hät me schnell gmerkt, so öppis isch nie und nimmer mögli
do hät au de treueschti Fan ganz schnell müesse begriife,
so gwönnt d’Schwiz höchstens gäg d’Sangaller Pfiife
Refrain: S’isch jo nur es chliises Träumli gsi, Träumli sind jo no so schnell verbii.
S’isch jo nur es chliises Träumli gsi, Träumli sind so schnell verbii.
Üseri UBS AG hät wieder mol es truurigs Jöhrli gha
dasäs wieder guet chunnt, do glaubt niemerd meh recht drah
Sogar de Verwaltigsrot hät sini Aktie verchauft,
isch doch kei Wunder, dass denä au de Ospel devo lauft.
Nur üse Bundesrot hät wiiters Kapital drinnine geh,
debii het mer das Geld au für de Werchhof Herisau chönne neh
Refrain: „Kriisli“
I de Sangaller Beize tarf mä sit letscht Johr nüme rauche
Und d’Gwünn sind drum scho länger tüüf am tauche
Au bi üs im Usserrhode wird das Gsetzli cho
Damit au do dä Jugendschutz mol endlich ernscht wird gnoh
Aber di Minderjöhrige stört das nöd, sie lached voller Hohn
„Wenn mer nüme suufe und rauche tarf, gömmer halt anes Botellon!“
Refrain: „Stümpli“
Üsi Armee hät eimol meh, s’isch würklich nöd zum witzle
Nur dur Skandäl glänzt, au Dank em Nefli a de Spitze
Er hät übers Internet Kontäkt für sini Verflosseni gsuecht
Und dodemit au grad en tüüre Aawalt buecht
Für üse Chef Armee häts gheisse: Tschau mini Dame und guet Nacht!
Ganz andersch de Beni Thurnherr, wo mit Jüngere umemacht!
Refrain: „Sehnsucht“
D’Olympiade z’Peking hät vill neui Weltrekördli brocht,
so vill, dass de Sportfan kuum meh richtig schloft
denn er glaubt, und mir chönds ihm nöd verdänke
ohni Doping tuesch de Sieg schlichtweg verschänke
Trotz Smog so tolli Leischtige, do sind mir Füür und Flamme
Und empfehled das Doping au für Neapels Kehrichtmanne.
Refrain: „Sprütze – d’Wirkig“
Dä Putin hät gmerkt das er mit Gas vill Geld chan mache,
und tuet mit em Medwedew heimlich is Füschtli lache
im chältischte Winter sit Johrzehnte gits en Gasboykott
und ganz Europa denkt sofort anen Komplott
Denn statt em erwünschte Gas vo de riche russische Zaare
Chömed usem Oschte bald d’Rumäne und Bulgare.
Refrain: „Chälti“
Voller Freud go wähle sind d’Lüüt das Johr z’Amerika
Sie händ weiss Gott gnueg lang en Tubel a de Spitze gha
sMotto vom Neue heisst ganz simpel: „Yes we can!“
und fascht di ganzi Welt bekennt sich grad zum Fan
en Schwarze als Präsident, das isch e grossi Sensation,
grad so wiänen Ospel es Johr lang ohni Lohn
Refrain: „Tschortschi – d’Amtsziit“
Gwüssi Lüüt wönd d’Landsgmeind wieder iifüehre
Denn diä tuet au hüt no mängem s’Herz berüehre
E bsonders Gfühl isches im grosse Ring inne z’stoh
Und ufem Heiwäg i jedes Gasthuus inezgoh
Das Spektakel lockt au Tourischte in Schare ah,
und dank dä Mehriinahme chönnted mir üsi KB wieder ha
Refrain: „Traditiönli“
Rund um dä Fuessball wird prüglet, kämpft und knüpplet
Und bi dä Polizei chräftig d’Tränegas-Kartusche gschüttlet
Es isch e Schand wa im Name vom Sport alles passiert
Und d’Öffentlichkeit isch ab derä Gwalt völlig schockiert
Nur dä Ueli Muurer frohlockt und isch total ufgstellt:
„Mit denä chräftige Manne mach ich die bescht Armee vo dä Wält!“
Refrain: „Kämpfli“
Es isch e Tatsach, dass sich üsers Klima wandlet
Und äs wird Ziit, dass d’Menschheit endlich handlet
En Idee wär, s’Autofahre starch iizschränke
Aber Chrysler, Ford & Co. händ do grossi Bedenke
Nur i de Schwiiz isch mer parat für di heissi Phase,
es wachsed zwor no kei Ananas, aber immerhin simmer e Stüür-Oase
Refrain: „heisse Sommer“
D’Sangaller Baubehörde hät seltä e glücklichi Hand
Zum Biispil bim Baumhuus-Striit, döt chunnt niä e Einigung zustand
Di neuscht Idee isch, zum d’Alkoholiker vertriibe
de Markt am Bohl umzbaue, dass diä nüme döt chönd bliibe
Vill besser wärs, wänn d’Sangaller sich endlich würded traue
Für all diä Süüfer i de Stadt e neui Halle Sibä z’baue
Refrain: „Überhöchi - dä Rückbau“
Uf de Schwiizer Strosse, s’werd je länger desto schlimmer
Tüends rase und Rennä fahre, ohni Rücksicht uf üsi Chinder
Sogar am Wochenend, wo mers gmüetlich chönnti neh
Wönd vorallem diä mit Migrationshintergrund, immer no meh Gas geh
Anderscht d’Politiker, diä lönd sich Ziit – nöd nur bim Bund
Oder glaubt vo Eu öpper, dass ösi Umfahrigsstross bald chunnt?
Refrain: „roti Ample“
Die Schnitzelbänke wurden möglich gemacht dank:
